BAGWIS: Isang Kagamitang Pampagkatuto sa Pag-aaral ng mga Tauhan sa Ang Ibong Adarna

Abstract

Ang papel-pananaliksik na ito ay may layuning makabuo ng isang kagamitang pampagkatuto sa pag-aaral ng mga tauhan sa obra maestrang Ang Ibong Adarna. Mula sa paggagad ng mga datos sa pamamagitan ng deskriptibo-ebalwatibong pamamaraan, nakabuo ang mananaliksik ng isang kagamitang makatutulong at makapagpapaunlad ng karunungan at interes ng mga mag-aaral sa pagkatuto. Sa tulong ng mga naging respondente sa pag-aaral, ang mga piling mag-aaral mula sa Baitang 11 at Baitang 7 maging ang ilang guro sa Filipino ng Basud National High School, matagumpay na naisakatuparan ang mga layunin sa pag-aaral. Batay sa naging resulta ng inisyal na sarbey, ang obra maestrang pinakahirapan ang mga nasa Baitang 11 sa kanilang Junior High School ay Ang Ibong Adarna partikular ang mga tauhan sa akda. Ginamit ang Stratified Random Sampling sa pagpili ng mga naging respondente. Mula sa kabuuang bilang na 364 ay kinuha ang 25% na 91 na kumatawan sa kabuuang populasyon. Sa resulta ng antas ng kaalaman ng mga mag-aaral sa mga panitikan, lumabas sa pag-aaral na 57.1% ang pinakanahirapan sa Ang Ibong Adarna, at nagkamit ng rating scale na 2.91 ang Tauhan na nangangahulugang sa aspetong ito sila pinakanahirapan. Batay rin sa naging resulta ng sarbey ay makatutulong ang pagbuo ng isang kagamitang pampagkatuto, mula sa tatlong pamimilian ay napili nila ang board game na mayroong 49 tugon na kumakatawan sa 53.8% ng kabuuang bilang ng respondente. Ang resulta ng inisyal na sarbey ang naging saligan ng mananaliksik sa pagbuo ng kagamitan. Sa tulong ng mga kaugnay na literatura at pag-aaral ay nabuo ang konsepto ng BAGWIS Board Game. Pinag-aralan ng mananaliksik at pinag-isipan kung paano maisasakatuparan ang kagamitang nabanggit. Ang salitang ‘Bagwis’ ay nangangahulugang ‘pakpak’ na kung ihahalintulad sa akda ay direktang maihahambing sa pakpak ng Ibong Adarna na sumisimbolo ng kalayaan, pag-asa, at tagumpay. Ang mga nabanggit ang parehong magiging mithiin ng mga manlalaro ng BAGWIS – ang malagpasan ang mga pagsubok, makarating sa taas at maabot ang tagumpay sa laro.

Matapos magawa ang BAGWIS Board Game ay nagkaroon ng demonstrasyon sa harap ng isang section ng Baitang 7 na siyang nag-aaral ng Ang Ibong Adarna na binubuo ng 40 mag-aaral, gayundin kasama ang sampung guro sa Filipino. Sinubukang laruin at pagkatapos ay sinuri ang antas ng katanggapan nito. Mula sa kabuuang bilang na 50 respondente ay nakakuha ng rating score na 3.6 na nangangahulugang Lubos na Sumasang-ayon na ang kagamitang nabuo ay makatutulong sa pag-aaral ng mga tauhan sa obra maestrang Ang Ibong Adarna. Bilang rekomendasyon ng ilang guro, hiniling nilang madagdagan pa ang mga tanong na sasagutin ng mga mag-aaral upang higit ang pagkakataon na sila ay mag-isip. Ngunit sa kabuuan, ito ay isang kagamitang sa palagay nila ay makatutulong na makakuha ng interes sa mga mag-aaral sa pag-aaral.

Bilang konklusyon, ang binuong BAGWIS Board Game na isang kagamitang pampagkatuto ay mabisa at makatutulong sa pagpapaunlad ng pagkatuto ng mga mag-aaral sa Baitang 7 sa pag-aaral ng mga tauhan sa obra maestrang Ang Ibong Adarna.